លោក ទេព នីថា ជាប់វគ្គជម្រុះអគ្គលេខាធិការ របស់ គ.ជ.ប
06-January-2016 | ដោយ មួយឡា
ភ្នំពេញ៖ ក្នុងចំណោមបេក្ខជនដែលប្រឡង កាន់តួនាទីអគ្គលេខាធិការ គណៈកម្មាធិការជាតិរៀបចំការបោះឆ្នោតជាង២០រូបនោះ ពេលជម្រុះបាននៅសល់តែ៣រូបប៉ុណ្ណោះ ក្នុងនោះក៏មានលោក ទេព នីថា ដែរ។ ចំណែកលោក នី ចរិយា ដែលត្រូវបានមជ្ឈដ្ឋានមួយចំនួនសម្ដែងមតិគាំទ្រនោះ ក៏ជាប់ក្នុងវគ្គជម្រុះអគ្គលេខាធិការរងដែរ ក្នុងចំណោមបេក្ខជនដាក់ជាង៨០នាក់។
ក្រោយពី គ.ជ.ប បានប្រជុំពិភាក្សាគ្នាជម្រុះបេក្ខជនដាក់ពាក្យប្រឡងតួនាទី អគ្គលេខាធិការ និងអគ្គលេខាធិការរង យ៉ាងតានតឹងអស់រយៈពេល២ថ្ងៃរួចមក នៅពេលនេះសមាសភាពបេក្ខជនប្រកួតប្រជែងកាន់តំណែងអគ្គលេខាធិការ គ.ជ.ប បានលេចមុខមាត់ចំនួន៣រូប ក្នុងនោះមានលោក ទេព នីថា អគ្គលេខាធិការចាស់ គ.ជ.ប លោក ហេង មណីចិន្ដា ប្រធានអង្គការពុទ្ធសាសនាដើម្បីអភិវឌ្ឍន៍ និងលោក យ៉ា ណាវុធ នាយកអង្គការខារ៉ាមកម្ពុជា។
ចំណែកតួនាទីអគ្គលេខាធិការរង គជប ក៏បានលេចចេញសមាសភាពចំនួន១២ រូប ដោយក្នុងនោះក៏មានលោក នី ចរិយា មន្ត្រីការពារសិទ្ធិមនុស្សសមាគមអាដហុក ដែលមានប្រជាពលរដ្ឋមួយចំនួនបានស្គាល់និងគាំទ្រឲ្យលោកកាន់តួនាទីនេះ។
ក្រៅពីលោក នី ចរិយា ក៏មានបេក្ខជនមកពីអង្គភាព និងស្ថាប័នផ្សេងជាប់វគ្គចម្រុះនេះក្នុងនោះរួមមាន លោក ម៉ៅ សុភារិទ្ធិ លោក សំ សុគង់ លោក គឹម ឈន លោក សោម សូរីដា លោក ម៉ុក ដារ៉ា លោក កាន់ ប៊ុនវីរៈ លោក ណេ ហ្សូនី លោក សុកុលៈ ទីប៉ោ លោក រស់ សូ លោក យ៉ត ប៊ុននី និងអ្នកស្រី លឹម ច័ន្ទលីដា។
ប៉ុន្តែយ៉ាងណាបេក្ខជនដែលមានឈ្មោះជាប់ក្នុងបញ្ជីតួនាទី អគ្គលេខាធិការ និងអគ្គលេខាធិការរងទាំងនេះ គឺជាជំហានទី១ ប៉ុណ្ណោះ ហើយពួកគេស្ថិតនៅក្នុងវគ្គជម្រុះម្ដងទៀត។ បើតាមលោក ហង្ស ពុទ្ធា អ្នកនាំពាក្យគ.ជ.ប បេក្ខជនដែលដាក់ពាក្យប្រឡងកាន់តំណែងអគ្គលេខាធិការ និងអគ្គលេខាធិការរង គ.ជ.ប នេះ គឺត្រូវអនុវត្តតាមរយៈការបោះឆ្នោតសម្រេចពីសមាជិកគ.ជ.ប ដោយសំឡេង ៥០ ភាគរយបូក ១ ។ ហើយនៅថ្ងៃទី១៥ មករា នេះ គ.ជ.ប នឹងប្រកាសឈ្មោះបេក្ខជន ដែលប្រឡងជាប់តំណែងអគ្គលេខាធិការ និងអគ្គលេខាធិការរង គជប ។
គួរបញ្ជាក់ថា គ.ជ.ប ជ្រើសរើសអគ្គលេខាធិការ ១រូប និងអគ្គលេខាធិការរងចំនួន៤រូប៕
ប្រភព៖ thmeythmey
ចំនួនអ្នកទស្សនា
- ថ្ងៃនេះ451
- ម្សិលមិញ12101
- សប្តាហ៍នេះ12561
- ខែនេះ127711
- ឆ្នាំនេះ127711
- សរុប20570167